Emri i trajnerit të kombëtares shqiptare, Gianni de Biasi, vazhdon të përmendet gjithnjë e më shumë mes kandidatëve të mundshëm për të marrë drejtimin e klubit të Lazios në sezonin e ardhshëm.
Edhe pse kandidati kryesor mbetet serbi Sinisa Mihajlovic, i parapëlqyer nga presidenti Claudio Lolito, drejtori sportiv i klubit italian, Igli Tare, po bën maksimumin që në drejtimin e skuadrës të emërohet De Biasi.
Tare ka pasur vazhdimisht fërkime me Mihajloviç gjatë periudhës kur ishin futbollistë, ndërsa është i bindur se tekniku aktual i Shqipërisë do të ishte më i përshtatshëm për të ndërtuar një cikël të ri fitues te Lazio.
Sipas mediave italiane, trajneri i Shqipërisë admirohet për faktin se është një motivues i shkëlqyer dhe mund të bindë disa nga emrat e njohur që të mos e braktisin Lazion në verë.
