Presidenti Ilir Meta, gjatë një konference për mediat këtë të Premte, duke iu përgjigjur interesit të gazetarëve, foli për konfliktin në PD dhe protestën e 8 Janarit.
Meta tha se “dënon dhunën nga të dyja anët”. Ai u shpreh se protestuesit dhunuan dyert e blinduara. Po ashtu, konstatoi dhunë ndaj qytetarëve e protestuesve, duke iu referuar episodit në ballkonin e PD, ku persona që ishin brenda selisë goditën protestuesit.
Ai shtoi se është i shqetësuar për situatën dhe sipas tij zgjidhja është vetëm një: Vota e lirë, respektimi i vullnetit të shumicës dhe garantimi i fraksioneve.
“Thelbi i konfliktit është mungesa e vullnetit për të respektuar votën e lirë”, theksoi Meta.
Ai ironizoi teksa përmendi dorëheqjen e rojës së selisë. “Zhvillimet e 8 janarit sollën edhe ndonjë shembull pozitiv që bën thirrje për reflektim si dorëheqja e rojës së selisë së PD për të mos qenë dëshmitar i dhunës. Uroj që të gjithë të ngrihen në nivelin e përgjegjshmërisë së tij”, tha kreu i shtetit.
Meta përmendi reagimin e tij në ditën e protestës, kur bëri thirrje për protestë paqësore. Po ashtu, tregoi komunikimet përmes telefonin me Belind Këlliçi, të cilit i kishte kërkuar protestë paqësore.
