Nga Boldnews.al
Komisioni i Prokurimit Publik (KPP) ka rrëzuar vendimin e Bashkisë së Tiranës, me të cilin shpallte kompaninë “Bami” shpk fitues të tenderit për “Sistemim dhe Asfaltim të rrugës së fshatit Qinam, në Zall Herr”, me fond limit mbi 800 milionë lekë të vjetra.
Në një vendim që mban datën 20 Dhjetor 2021, KPP konstaton se bashkia e drejtuar nga Erion Veliaj ka skualifikuar në kundërshtim me ligjin të paktën një prej operatorëve ekonomikë, duke favorizuar dukshëm shoqërinë private të biznesmenit Besnik Bami.
Sipas Komisionit të Prokurimit Publik, Bashkia e Tiranës ka skualifikuar shoqërinë “K…R…” shpk për mungesë dokumentacioni, ndërkohë që institucioni detyrohej nga ligji për të verifikuar të dhënat e vetëparaqitura nga konkurentët në garë.
Vendimi i KPP-së ka një gjuhë të drunjtë, megjithëse krijohet dyshimi se Veliaj dhe administrata e tij kanë qenë të bindur për t’ia dhënë tenderin e Zall Herrit kompanisë “Bami” shpk.
Tenderi 800 mln lekë
Tenderi për asfaltimin e rrugës së fshatit Qinam në periferinë veriore të Bashkisë së Tiranës u shpall në Tetor të këtij viti dhe fondi limit në dispozicion të kompanive private ishte 80.820.393 lekë të reja.
Në tender morën pjesë një numër i konsiderueshëm konkurentësh, plot 33 të tillë, nga të cilët 22 u skualifikuan.
Kompania “Bami” shpk, e cila kishte dhënë ofertën e 11-të në radhë, me vlerë 50.4 milionë lekë të reja, u shpall paraprakisht fituese nga Bashkia e Tiranës, pasi më parë ishin skualifikuar 10 konkurentët që kishin ofruar shuma më të ulta për kryerjen e punës publike.
Për njërën prej kompanive, e konkretisht “K…R…” shpk, Bashkia vendosi skualifikimin, me argumentin se njëri prej formularëve të dosjes së tenderit, e konkretisht ai i Vetëdeklarimit të kapaciteteve të mjaftueshme për punë publike, nuk ishte shoqëruar me dokumenta shtesë.
Kompania e skualifikuar i drejtohet me një ankesë Bashkisë së Veliajt, ku i sqaron se ligji parashikon që autoriteti kontraktor mund t’i sigurojë vetë të dhënat nëpërmjet platformave on-line ose t’i kërkojë informacione shtesë operatorit ekonomik përpara vendimmarrjes.
Por, ankesa e kompanisë private nuk u mor në konsideratë nga Veliaj, i cili ishte i prerë që tenderin 800 milionë lekë të vjetra të fitohej nga “Bami” shpk.
Në vijim, kompania e pakënaqur iu drejtua Komisionit të Prokurimit Publik.
Ky i fundit, pasi analizoi të dhënat e dosjes dhe shqyrtoi argumentat e palëve, konstatoi se vendimi i Bashkisë së Tiranës për skualifikimin e kompanisë “K…R…” ishte i padrejtë.
Në përfundim, KPP vendosi që të detyrojë bashkinë e drejtuar nga Erion Veliaj të kualifikojë kompaninë ankimuese, e cila, për shkak të ofertës më të ulët, pritet të rezultojë edhe fituese përballë “Bami” shpk.
