Të tjera detaje zbardhen lidhur me ngjarjen e rëndë të ndodhur pasditen e sotme në qendër të Shkodrës, ku u ekzekutua ish-deputeti dhe ish-Kryekomunari, Pashko Ujka.
Ujka, 64 vjeç, u qëllua me armë me silenciator, ndërsa po ecte i shoqëruar nga bashkëshortja dhe vëllai i tij.
Ngjarja ka ndodhur pranë banesës së Ujkës dhe mendohet se ekzekutori ka vepruar i vetëm, ndërsa dyshimet janë se përgjatë kohëve të fundit, ai mund të ketë qenë i monitoruar nga persona të tjerë lidhur me lëvizjet që bënte.
Policia ka arritur të marrë dëshminë e bashkëshortes së Ujkës.
“Nuk kam parë asgjë dhe as nuk kam dëgjuar krisma. Kam parë Pashkon që është shtrirë në tokë. Nuk kemi asnjë konflikt apo përplasje”, ka thënë bashkëshortja e Ujkës në dëshminë paraprake para hetuesve në lidhje me atentatin ndaj të shoqit.
Nga informacionet deri më tani, mësohet se policia po heton në dy pista. Pista e parë është ajo që lidhet me punën e tij si ish-kryetar i Komunës së Velipojës ndërsa pista e dytë e hetimit ka të bëjë veprimtarinë e tij private, pasi ai njihej si ndërtues por edhe kishte biznese në fushën e hotelerisë.
Ndaj 64-vjeçarit është bërë disa herë atentat, madje ka rënë pre e dhunës nga persona të tjerë. Në një rast mësohet se kanë qëlluar me armë zjarri në ajër në afërsi të banesës së tij.
