Vllaznia ka marrë një fitore minimale 1-0 ndaj Laçit në ”Loro Boriçi” në një ndeshje që u luajt mes reshjeve të shiut.
Ndeshja nisi me vrull dhe Vllaznia pati mundësi të shënonte që në minutën e dytë me anë të Liridon Latifit, i cili nuk goditi si duhet pak metra me portën. Sulmuesi anësor provoi edhe një herë tjetërnë minutën e 19-të, por u ndal nga portieri Dajsinani.
Laçi nga ana tjetër u shfaq rrezikshëm me Velijën. Zogovic e ndali në momentin e parë, kurse më pas nuk goditi dot. Aralica ishte ai që trembi Laçin, një herë me një gjuajtje fluturimthi dhe në rastin tjetër kur goditi shtyllën pas një gabimi në mbrojtje të bardhezinjve.
Për bardhezinjtë e Josës provoi në një moment edhe Guindi, i cili u ndal nga portieri Zogovic. 45 minutat e para në “Loro Boriçi” u mbyllën pa gola, 0-0. Fraksioni i dytë i lojës nisi me gol.
Victor Da Silva, i aktivizuar nga trajneri Brdaric, pas katër minutash lojë ndëshkoi portierin Dajsinani dhe në “Loro Boriçi” nisi festa.
Aralica më pas iu afrua edhe golit të dytë, por portieri Dajsinani i mbajti kurbinasit në lojë. Gjithsesi deri në fund nuk ndryshoi gjë dhe Vllaznia mori tre pikët.
