Pas fitores së Kukësit në përballjen me Tiranën, presidenti i Nderit i verilindorëve, Safet Gjici foli për suksesin e arritur dhe për stadiumin e ri. Fillimisht ai u shpreh i kënaqur për 3 pikët edhe pse tha se që nesër nis nje tjetër ditë e re për skuadrën.
“Kur fiton, normal që kënaqesh, por futbolli nuk mbaron këtu. Kënaqemi vetëm për këtë ndeshje sepse nesër vazhdon puna pasi vjen ndeshja e radhës. Sot shkoi mirë dhe mundëm skuadrën që është në vendin e parë me meritë e padyshim që jemi të kënaqur por kampionati është i gjatë. Përgjegjësitë në klub? Ka 2-3 vite që nuk jam afër skuadrës pasi kam angazhimet e mira. Unë vij shikoj ndeshjen, mendoj se Pejic duhet të jetë më shumë kërkues që gjërat të funksionjnë më mirë. Jemi në rrugën e duhur mendoj”.
Lidhur me stadiumin e ri “Zeqir Ymeri”, numri 1 i Kukësit saktëson se gjithçka do të jetë gati për 10 ditë por për fushën vendosin të tjerët.
“E kishim planifikuar që të luanim me Tiranën, por specialistët e fushës nuk na lejuan. Kur të na japin ata ok. Pjesa tjetër e stadiumit mbyllet brenda për 10 ditë, por për fushën na duhet miratimi i specialistëve. Është një investim i madh afro 10 milionë dollarë dhe u bë falë një investimi të rëndësishëm por falë edhe skuadrës. Po të mos ishte ekipi stadium që është një vlerë e shtuar nuk do të bëhej”.
Në fund, Gjici tha edhe një batutë i pyetur për delegimin e pozitave drejtuesve te fëmijët ku as djali i tij e as ai i Refik Halilit te Tirana, sipas tij nuk janë për një pozicion të tillë drejtues ne futboll.
