Një person u arrestua nga policia e Tiranës dhe bashkëpunëtori i tij sirian u shpall në kërkim lidhur me një skemë që kishin ngritur për kalimin ilegalisht të refugjatëve nga Lindja e Mesme, nga Shqipëria drejt BE-së.
Në pranga u vu Henri Lika, 29 vjeç, banues në Durrës, për veprën penale “Ndihma për kalim të paligjshëm të kufijve” e kryer në bashkëpunim dhe u shpall në kërkim bashkëpunëtori i tij, shtetasi sirian Khalid Alnada, 40 vjeç, banues në Emiratet e Bashkuara Arabe.
Sipas hetimeve, këta dy persona, në bashkëpunim dhe me persona të tjerë nga Emiratet e Bashkuara Arabe, siguronin ftesa fiktive për persona të ndryshëm të huaj kryesisht nga vende si Siria, Egjipti dhe shtete të tjera nga Lindja e Mesme për të ardhur në Shqipëri me justifikimin për qëllime turistike, të cilët më pas ju siguronin ndihmë për t’u larguar në mënyrë të jashtëligjshme nga vendi jonë drejt vendeve të BE-së.
Po ashtu, u proceduan penalisht dhe 7 shtetas të huaj, për veprën penale “Kalimi i paligjshëm i kufirit”, konkretisht shtetasit: A. A., 33 vjeç; A. A., 38 vjeç; B. B., 28 vjeç; A. A., 34 vjeç; A. A., 52 vjeç; A. I., 54 vjeç; A. M., 39 vjeç.
“Vijon puna për identifikimin e personave të tjerë, të përfshirë në këtë veprimtari kriminale, ndërsa materialet proceduriale i kaluan Prokurorisë pranë Gjykatës së Shkallës së Parë Tiranë, për veprime të mëtejshme”, njoftoi policia.
