Një ngjarje tragjike është regjistruar në brigjet e provincës jugore të Jemenit, Abyan, ku është fundosur një anije me refugjatë, për shkak të motit të keq.
Sipas raporteve të pa konfirmuara, në anije ndodheshin të paktën 154 persona, ku 54 refugjatë kanë humbur jetën dhe të paktën 100 të tjerë rezultojnë të zhdukur pas këtij incidenti.
Operacionet e kërkimit dhe shpëtimit vazhdojnë, ndërsa autoritetet po përballen me kushte të vështira për të gjetur refugjatët e zhdukur.
Kjo është vetëm një nga shumë tragjeditë e ndodhura kohët e fundit me refugjatë afrikanë që përpiqen të arrijnë vendet e pasura të Gjirit përmes rrugëve detare tepër të rrezikshme, ku shpesh përdoren nga kontrabandistët mjete të tejmbushura dhe të pasigurta.
Pavarësisht luftës civile që po zgjat prej më shumë se një dekade, Jemeni vijon të jetë një korridor i rrezikshëm për refugjatët nga Afrika Lindore që ëndërrojnë një jetë më të mirë në vendet arabe të Gjirit.
Vetëm në muajin mars, katër varka u përmbysën pranë Jemenit dhe Xhibutit, duke shkaktuar vdekjen e dy refugjatëve dhe zhdukjen e 186 të tjerëve.
