Kryeministri Edi Rama duke folur në Parlament, tha se ndryshimi mes nesh dhe opozitës, është se sytë e tyre janë imunizuar nga plehrat urbane.
“Në kohën kur ju qeverisnit duhej të dilje me duar në hundë që të mos merrje erë dhe me sytë mbyllur që mos shikoje atë që ndodhte me mjedisin, ne kemi një dallim thelbësor estetik me ju”, iu drejtua Rama, opozitës në Kuvend.
Kryeministri tha se numri i familjeve që po gëzojnë shtëpitë e reja është i madh dhe do të rritet eksponencialisht deri në datën 26 nëntor, kur bëhet edhe dy vjet nga tërmeti.
“Ju ftoj z.Xhaferri të na bashkoheni kur të hapim duert e shtëpive në Ishëm, Thumanë, Lezhë, Tiranë, dhe të shikoni me sytë tuaj. Rrijini larg shumë çështjes së tërmetit, pasi bëheni shumë qesharak”, tha Rama.
Ai solli shembullin e Italisë, ku sipas tij, njerëzit ndodhen ende në rulota pas 15, 12 apo 9 vitesh nga tërmetet.
“Nuk jemi më të zotë, por nuk kemi luks ti lemë njerëzit të presin”, tha Rama. Sipas tij, afatet u spostuan për shkak të pandemisë.
“Asnjë familje, që është kthyer apo do të kthehet në banesat e reja, sot nuk është më keq, se sa ishte para tërmetit. Në të gjitha pikat ku ka goditur tërmeti u krijuan mundësi të reja që ato familje të jetojnë jo vetëm në shtëpi më të mira, por edhe në komunitete që as i kishin më parë mundësitë”, tha Rama.
Propaganda e Ramës u bë në kuadrin e një interpelance që u kërkua nga deputeti i PD-së, Ferdinand Xhaferri, lidhur me procesin e rindërtimit.
