Një 40-vjeçar u arrestua nga policia e Lezhës pasi në makinë i është gjetur drogë.
Policia njoftoi se “mbi bazën e informacioneve të marra në rrugë operative se një shtetas që qarkullonte me automjet, shpërndante lëndë narkotike në doza, në lagjen ‘Gurra’, shërbimet e Policisë Lezhë kanë bërë të mundur lokalizimin dhe ndalimin e mjetit të dyshuar”.
Gjatë kontrollit të ushtruar në automjetin me drejtues shtetasin B.Z., në bagazh, efektivët gjetën doza me lëndë të dyshuar narkotike cannabis sativa, gati për shitje, të cilat u sekuestruan në cilësinë e provës materiale së bashku me automjetin.
Në përfundim të veprimeve, specialistët për Hetimin e Narkotikëve dhe Trafiqeve në DVP Lezhë bënë arrestimin në flagrancë të drejtuesit të mjetit, shtetasit B.Z., 40 vjeç, banues në Ungrej, Lezhë. Ndaj 40-vjeçarit rëndon akuza për veprën penale “Prodhimi dhe shitja e narkotikëve”.
