Kryetari i PD-së, Lulzim Basha deklaroi këtë të Premte se aleanca e Partisë Demokratike me Shtetet e Bashkuara është e pacënueshme.
Deklarata vjen një ditë pas takimit që ish-kryeministri Sali Berisha zhvilloi në Tiranë me demokratë, ku kërkoi dhe dorëheqjen e Bashës nga drejtimi i Partisë Demokratike.
Këtë të Premte, në një prononcim për mediat në hyrje të selisë blu, Basha, në përgjigje të pyetjes së gazetarëve lidhur me deklaratat e Berishës u shpreh:
“Nuk kam asgjë për ti shtuar asaj që kam deklaruar një javë më parë për sa i përket kontributit të Sali Berishës për zhvillimin e Shqipërisë, demokracisë dhe aleancës me SHBA-të, por dua të jem fare i qartë, aleanca dhe partneriteti i PD me SHBA-të duhet dhe do të mbetet i pacënueshëm në interesin më të mirë të demokratëve shqiptarë, në interesin më të mirë të së nesërmes së Shqipërisë dhe të shqiptarëve dhe për këtë arsye ne së bashku me gjithë shqiptarët që mezi presin ndryshimin do të bëjmë gjithçka për ta realizuar aspiratën e tyre për ndryshim. Nuk ka kthim pas”.
Akuza hodhi dhe ndaj qeverisë “Rama 3”, që këtë mëngjes mori votëbesimin në parlament.
“77 votat e sotme janë formalizmi i PPP-së Rama-Doshi-Rakipi. Bashkë me kriminelët e dosjes 184 të vjedhjes se zgjedhjeve në Dibër dhe të dosjes 339 të Shijakut, bashkë me Rrahman Rrajën të njohur ndërkombëtarisht për rekordet e tij kriminale, janë fatkeqësia më e madhe për çdo shqiptar, janë fatkeqësia kombëtare. Qëllimi i kësaj PPP-je, i kësaj pakice plaçkitësish, është të pasurojnë veten e tyre, të mbajnë pushtetin në kurriz dhe në kosto të familjeve shqiptare. Qëllimi ynë është të bëjmë gjithçka për ti larguar këta armiq të demokracisë nga salla e parlamentit dhe për ti kthyer shqiptarëve demokracinë, parlamentin dhe qeverisjen e vullnetit të tyre të lirë”, tha Basha.
