Pavarësisht se sërish ndodhemi në një vit pandemik dhe efektet vijojnë të jenë të konsiderueshme në ekonomi, paga mesatare mujore rezulton të jetë rritur me 2561 lekë gjatë tremujoritë të dytë të këtij viti, krahasuar me të njëjtën periudhë të 2020-ës. Sipas të dhënave të INSTAT, paga mesatare mujore bruto për një të punësuar me pagë, gjatë tremujorit të dytë 2021 është 56.710 lekë, duke u rritur me 4,7 %, krahasuar me të njëjtin tremujor të vitit të kaluar, por ndërkohë është regjistruar edhe në vlerën më të lartë që nga viti 2018.
Sipas INSTAT, gjatë tremujorit të dytë 2021, paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 2,13 herë më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim1 është 36,7 % më e ulët.
Rritjen më të madhe gjatë kësaj periudhe krahasuar me vitin që lam pas, e ka pasur grup-aktiviteti i Tregtisë; transportit; aktivitetet e akomodimit dhe shërbimit ushqimor, prej 9,2 %, ndërsa rritjen më të vogël e ka grup-aktiviteti i Aktiviteteve të pasurive të paluajtshme; Aktiviteteve shkencore, profesionale dhe teknike; Aktiviteteve të shërbimeve administrative dhe mbështetëse prej 0,7 %.
Sipas grupprofesioneve, më mirë paguhen ligjvënës, nëpunës të lartë të administratës shtetërore dhe drejtorë ekzekutivë dhe më pak punëtorët me profesione elementare. /SCAN TV/
