Ambasada amerikane ka përshëndetur vendimin e kryetarit të Partisë Demokratike Lulzim Basha, i cili një ditë më parë njoftoi përjashtimin e Sali Berishës nga grupi parlamentar demokrat.
Në një reagim në rrjetet sociale, ambasada shkroi se “vendimi i vështirë i shpallur dje nga Kryetari Lulzim Basha meriton respekt”.
“Ky vendim demonstron se, ashtu siç ndodhi 30 vjet më parë dhe në momente të tjera kritike në historinë e Shqipërisë, Partia Demokratike ka kurajon për t’u ndarë nga e shkuara me qëllim që të ndërtojë të ardhmen, për të ndihmuar që ta udhëheqë Shqipërinë përpara. Shtetet e Bashkuara kanë pasur një marrëdhënie të veçantë me Partinë Demokratike që nga themelimi i saj dhe presim me kënaqësi të punojmë më ngushtë se kurrë me Kryetarin Basha dhe Partinë Demokratike për të forcuar marrëdhëniet SHBA-Shqipëri”, thuhet më tej në reagim.
Kujtojmë se që pas shpalljes së Berishës “non grata”, ambasadorja amerikane në vendin tonë, Yuri Kim ka kërkuar publikisht distancimin e PD-së nga Berisha, duke paralajmëruar se ndryshe partia “do hajë bar”.
Paditen e djeshme, kryetari i PD, Lulzim Basha njoftoi vendimin për përjashtimin e liderit historik të demokratëve Sali Berishës, nga grupi parlamentar demokrat. Vendimi, tha Basha, do të jetë në fuqi “deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje (shpalljen non grata nga ‘DASH’)” në rrugë gjyqësore.
Vetë Berisha e cilësoi vendimin një gabim fatal të Bashës dhe tha se ai erdhi pas presioneve të mëdha që ka marrë kreu i PD, duke u kërcënuar me sanksione.
Berisha u shpreh se me këtë vendin, Basha “dorëzoi sovranitetin e PD” dhe partia opozitare u kthye në një satelit të Edi Ramës. Ai u zotua se do të bëjë gjithçka për kthimin e sovranitetin të Partisë Demokratike.
Për seancën e sotme, Berisha u shpreh mbrëmjen e djeshme se do të jetë në Kuvend.
Në Partinë Demokratike ndërkohë, kanë qenë të ndarë për vendimin e kryetarit Lulzim Basha. Në mbledhjen e grupit parlamentar, ky i fundit ka thënë se vendimi ishte i tiji personal dhe askush tjetër nuk ka përgjegjësi.
