Tre persona u arrestuan nga policia e Tiranës për shpërndarje droge. E. Gj., 17 vjeç, D. S., 17 vjeç dhe E. H., 21 vjeç, u vunë në pranga. Gjithashtu u shpallën në kërkim, S.Gj., 21 vjeç dhe L. K., 20 vjeç.
“Nga ana e Seksionit për Hetimin e Narkotikëve të Drejtorisë Vendore të Policisë Tiranë ishin siguruar informacione në rrugë operative se shtetasit S. Gj. dhe L. K., të dyshuar si organizatorët e kësaj veprimtarie të kundërligjshme, siguronin lëndën narkotike kanabis në sasi 5-10 kg, të cilën e ndanin në doza dhe më pas ua jepnin shtetasve D. S. dhe E. Gj., të cilët ishin të punësuar për shitjen e lëndës narkotike në përdorues të ndryshëm në zonën e Pazarit të Ri, Medresesë dhe në rrugën ‘Frataj’.
Në bazë të këtyre informacioneve është organizuar puna dhe në rrugën ‘Frataj’ është kapur në kushtet e flagrancës shtetasi D. S., duke shitur lëndë narkotike kanabis në doza, të cilat u sekuestruan në cilësinë e provës, së bashku me një shumë parash të dyshuara të përfituara nga shitja e lëndës narkotike”, njoftoi policia.
“Në vijim të veprimeve, gjatë kontrollit në banesën e shtetasit të shpallur në kërkim S. Gj., u kap në kushtet e flagrancës shtetasi E. H, duke tentuar të heqë nga banesa, sendet e kundërligjshme që gjendeshin aty, të cilat u sekuestruan në cilësinë e provës materiale. Shtetasi E. H., në përfundim të veprimeve procedurale u arrestua për veprën penale ‘Veprime që pengojnë zbulimin e së vërtetës'”, shtuan të njëjtat burime.
