Ambasadori rus në Turqi Andrey Karlov është plagosur rëndë nga një atentat pasditen e sotme. Ngjarja ka ndodhur në Ankara, ku ambasadori është sulmuar nga persona të paidentifikuar dhe më pas është dërguar me urgjencë në spital.
Sipas asaj që ka raportuar një fotograf i Associated Press, diplomati rus është qëlluar ndërsa ndodhej në një ekspozitë fotografish.
Mediat turke raportojnë se autori ishte ende i fshehur në ndërtesën ku po bëhej ekspozita dhe se ka ende të shtëna.
Sipas raportimeve, ambasadori rus që ndodhet në Turqi që prej vitit 2013 është plagosur rëndë. Po kështu thuhet se ai ka qenë duke mbajtur një fjalim kur është qëlluar pas shpine. Tre persona të tjerë raportohet se janë plagosur.
Sipas CNN turk, të shtënat me armë dëgjohen ende dhe autori nuk është gjetur akoma nga policia.
Turqia ka kaluar disa sulme terroriste vitin e fundit, për të cilat qeveria ka fajësuar militantët kurdë.
Megjithatë ka dyshime se edhe militantët e ISIS veprojnë në këtë vend. Sulmi vjen pas ditësh të tëra proteste në Turqi kundër rolit të Rusisë në konfliktin sirian.
Rusia dhe Turqia kanë patur një marrëdhënie intensive kohët e fundit dhe të dyja kanë mbështetur fraksionet rivale në konfliktin sirian.
Gjithsesi, pasi përplasjet mes dy vendeve arritën kulmin kur Turqia qëlloi një avion rus në vitin 2015, Ankaraja dhe Moska kanë bërë përpjekje për të përmirësuar marrëdhëniet diplomatike.
