Ka nisur grumbullimi i qytetarëve në sheshin “Skënderbej”, nga ku do të nisë edhe dita e 15 e protestës qytetare me kërkesë kryesore largimin e qeverisë dhe dorëheqjen e kryeministrit Edi Rama.
Pas grumbullimit nis marshimi i protestuesve drejt Kryeministrisë, ku në sheshin para godinës mbahen fjalimet e qytetarëve, ku shprehen pakënaqësitë ndaj kastës politike.
Para nisjes së marshimit nga sheshi Skënderbej, foli për News24 njëri të rinjve aktivë në protestën dy-javore.
Ai u shpreh se është i pakënaqur me politikën në Shqipëri dhe kërkon ndryshim. Dy kërkesat më themelore për të janë, largimi i Edi Ramës si dhe i patronazhistëve.
“Si ditë për ditë në orën 6 e gjysëm, do bëjmë fjalime këtu dhe do nisim marshimi drejt Kryeministrisë. do ketë Fjalimet dhe do ketë marshime në kryeqytet. Bëhen ca plane gati, itinerari definitiv vendoset në shesh. jam një i ri 26 vjeçar kam mbaruar shkollën para disa vitesh dhe nuk jam i kënaqur me politikën në Shqipëri. Kërkoj dorëheqjen e Edi Ramë dhe të hiqen patronazhistët.” tha ai.
Tirana prej 14 ditësh ka qenë nën ‘pushtetin’ e protestuesve. Por jo vetëm Tirana, protestat janë shtrirë edhe në qytete të tjera në Shqipëri, të cilët njëzëri kërkojnë largimin e Ramës.
Një ditë më parë, të shtunën u mbajt tubimi më madhështor , protesta e 14 me një pjesëmarrje rekord, që ka kaluar çdo pritshmëri.
Të rinj, të reja, prindër me fëmijë, të moshuar, janë në protestë duke shprehur pakënaqësitë e tyre dhe padrejtësitë që iu janë bërë nga kjo qeveri dhe kjo klasë politike.
Mesazhi është i qartë “Rama jep dorëheqjen”. Gjithashtu akuza të forta nga protestuesit janë hedhur edhe ndaj opozitës.
