Ashtu si parafolësit edhe Gramoz Ruçi, një nga veteranët e PS-së e ka nisur fjalën e tij me falënderime. Një prej figurave që është vlerësuar së tepërmi ka qenë edhe ish-kreu i PS-së, Fatos Nano.
“Ky Kongres mblidhet 3 muaj para kremtimit të 25 vjetorit të themelimit të PS, ndaj do ta nisja fjalën me një përshëndetje të posaçme për të gjitha ato dhe ata mijëra gra e burra, që aderuan në forcën tonë politike në 25 vjet, që dhanë gjithçka për mbijetesën tonë, rritjen dhe reformimin e arritjet tona 25 vjeçare… Faleminderit, atij që dha gjithcka për rritjen, forcimin, përballimin e vështirësive të lindjes dhe rritjes, që bëri 4 vjet burg për të vetmin faj që kishte bërë se ishte kryetari jonë, të atij që edhe me aktin e fundit të dorëheqjes në 2005 dhe leksionin e fundit të demokracisë, Fatos Nanos.” – deklaroi Kryetari i grupit parlamentar socialist, Gramoz Ruçi.
Në një shenjë ndjese, Ruçi kërkoi rikthimin e Fatos Nanos në një rol aktiv në Partinë Socialiste.
“Ju drejtohem të gjithëve juve që drejtuat këto vite, PS është shtëpia juaj, ju thërret dhe ju kërkon ta falni edhe kur ka gabuar, përvoja juaj është jetike në çdo kohë për të përmbushur shpresat për një Shqipëri më të integruar në BE.”– shtoi Ruçi.
