Nga Boldnews.al
Komunikimi javor i kryeministrit Rama sot ishte më ndryshe. Ai u shfaq i tensionuar, i lodhur dhe mbi të gjitha i dëshpëruar për situatën ekonomike të vendit. Por kjo strategji e mirëmenduar e zyrës së marketingut të kryeministrisë, kërkon të tërheq të gjithë ata socialistë të mërzitur që në 2013 i dhanë votën Edi Ramës.
Ai u shpreh se ishte shumë i pakënaqur me veten dhe qeverinë e tij, madje ai i kërkoi të gjthë shqiptarëve që ta besojnë se ai është njeriu më i pakënaqur. Kreu i ekzekutivit thotë se i di të gjitha boshllëqet dhe gabimet e shtetit me të cilat ndeshen qytetarët.
“Dua ta ndaj me ju të vërtetën time se kur ju flas për arritje dhe rezultate, nuk jam aspak njeriu i kënaqur me veten apo qeverinë që drejtoj dhe nuk që asnjë nga ju të mendojë se – shiko çfarë pune të hatashme që kemi bërë, çohu në këmbë dhe fillo e brohorit – aspak, madje për kundrazi. Jam unë njeriu më i pakënaqur ndër të gjithë ju dhe ju lutem ta besoni këtë sepse unë e di më mirë se të gjithë sa shumë më tepër duhet bërë” – tha Rama.
Por kjo strategji e përdorur e kryeministrit Rama, ka për qëllim që të bëhet më tepër protagonist sesa aleati i tij në qeveri, Ilir Meta. Ky i fundit pothuajse në të gjitha daljet publike deklaron pa ndrojtje se qeveria ka bërë gabime dhe se vendi ynë nuk është aty ku duam.
Pendesa e Ramës në fund të mandatit qeverisës kërkon që të prek më të pakënaqurit, që për hir të vërtetës janë shumë e më shumë seç mendon ai. Në 2013, kryesocialisti kishte premtuar një rimëkëmbje të ekonomisë, por përveç fasadave për ndërtimin e qendrave të qyteteve, praktikisht në xhepat e shqiptarëve numërohen qindarkat.
Natyrisht pati një rimëkëmbje! “Rilindën” oligarkët që rrethojnë kryeministrin Rama dhe me të cilët jargaliset sa herë që i takon. U dha atyre miliona për shëndetësinë, miliona euro nga OSHEE dhe miliona euro nga tenderat publik, vetëm e vetëm që oligarkët e tij të kënaqeshin.
Por nuk mjaftoi me kaq…me bekimin e kryeministrit, qeveria e tij përdori miliona euro për propogandë dhe fasada, miliona euro u pastruan me ARMO-n, miliona euro u nxorrën jashtë Shqipërisë dhe miliona euro janë grabitur nëpër banka…kaq e kushtueshme paska qënë “Rilindja”.
Në fakt, Rama ndodhet në hall të madh dhe këtë e lë të kuptohet në komunikimin javor, me të cilën kërkon të manipulojë publikun. Por socialistët e ndershëm dhe ata që besuan tek kryetari i tyre piktor, sot janë të zhgënjyer. Nëse shikon zyrat e kësaj force politike nëpër degë të ndryshme, shumica prej tyre janë pothuajse bosh, pavarësisht se Boldnews.al mëson se janë urdhëruar të gjitha strukturat drejtuese për të nisur mbledhjet me bazën.
Si një politikan diletant por edhe si një njeri i pabesë, Rama ka dhunuar shpresën e shumë socialistëve . Sot, kryetari i forcës më të madhe politike në vend është i rrethuar nga vartës por jo nga profesionist, është i rrethuar nga shërbëtor por jo nga miq, është i rrethuar nga oligarkët klientë por jo nga biznesmenë karriere.
Opozita mund të jetë në ditët e veta më të këqija, por kjo nuk e ngushëllon dot kryeministrin pasi shqiptarët për të cilët flet me dhembshuri do t’i kundërvihen në mënyrën më të ashpër…
