Ngjarja e rëndë e ndodhur mesditën e të shtunës në fshatin ‘Kryemadhenj’ të Golemit, ku bashkëshorti dogji gruan dhe më pas vari veten ka tronditur të gjithë opinionin publik.
Fillimisht policia ka gjetur një makinë që po digjej dhe më pas kufomën e një gruaje brenda mjetit, 30 metër më larg është gjetur trupi i burrit të saj i varur në pemë.
Viktima janë Bilbil Shirja dhe Fëllënxa Shirja, të cilët kanë qenë në proces divorci. Ata ishin prindër të dy fëmijëve.
Ndërkohë ka folur për mediat vëllai i Bilbilit, Hasan Shirja i cili hedh poshtë hipotezën se ngjarja ka ndodhur për shkaqe xhelozie
“Na ka rënë si rrufe në qiell. Më shpejt e morën vesh njerëzit e tjerë se sa ne. Ka pasur konflikte me gruan, por jo në këtë shkallë. Bashkëshortja ishte te babai i vet, ai te ne. Ishte i qetë dhe pa probleme. Të hënën kishin pas një seancë pajtimi, e të gjithë ishim dakord që të pajtoheshin. Nuk kanë pas probleme nderi dhe ekonomie. Kanë pas një mosmarrëveshje, më 27 janar, nuk kanë pas asnjë problem. Familja e saj e mirë dhe në punë të vet. Sherri i tyre është për një sallatë, nuk e ka bërë. Fëllënxa i ka thënë ngrihu bëje vetë”, tha Hasani.
Sipas tij, nuk është e vërtetë se ka pasur punë xhelozie. “Ai ka dashur që të bashkohej. E merrte dhe e çonte në shtëpi. Ajo nuk ka qenë femër e hedhur, nuk mund të themi ashtu. Ajo nuk ka bërë denoncim, asnjë gjë”, shtoi vëllai i viktimës.
I pyetur nëse takoheshin ata të dy, Hasani tha: “Janë takuar te universiteti i Durrësit, e ka dërguar njëherë me makinë te shtëpia e prindërve, ku ajo jetonte. Ndërsa ditën e ngjarjes nuk e di ku e ka takuar, ai ka dalë herët në mëngjes nga shtëpia. Nuk ka dalë asnjëherë në atë orar. Kur unë isha në shtëpi, më merr djali e më pyet ku është Bilbili e më tha për makinën. Shkova atje, por nuk më la policia. U bë kjo hata, kanë lënë dy fëmijë. Bilbili ka qenë si gjithë njerëzit e tjerë. Nuk janë varrosur, pasi do vinte vajza ditën e mortit. Ajo ka qenë me Covid me burrin”.
