I pari deputet brenda mazhorancës kundër dekriminalizimit ishte Koço Kokëdhima, i cili e cilësoi atë si antikushtetues. I ftuar dje në Top Story, Kokëdhima tha se do të lobojë tek kolegët deputetë që ta shfuqizojnë përmes Gjykatës Kushtetuese.
“Është një ligj absurd, antikushtetues dhe fyes dhe unë do t’u kërkoj kolegëve të mi që t’i kërkojmë Gjykatës Kushtetuese që ta anulojë atë ligj”, tha Kokëdhima.
Deputeti i maxhorancës shtoi se është për ngritjen e një ligji për integritetin e zyrtarëve të lartë dhe të zgjedhurve sipas standardeve europiane.
Lidhur me debatet brenda PS, Kokëdhima tha se kundërshtohet sepse ka reformuar partinë në rajonet ku është kordinator.
“Nëse do të bësh punë, ndryshime dhe reforma, padyshim që ka kundërshti. Nëse do të bësh ndryshime të mëdha në një organizatë apo komunitet do të ketë debate, pëlqime dhe mospëlqime. Ajo reformë që kemi realizuar në Vlorë dhe Gjirokastrës i ka treguesit shumë të qartë. Ishte një reformë e strukturës politike dhe ekzekutive sepse ishte e nevojshme kjo gjë. Në Vlorë dhe gjirokastër kishim në letra 12 mijë anëtarë, sot PS ka 22 mijë anëtarë në mënyrë të vërtetë në rajonin Vlorë dhe Gjirokastër dhe këta anëtarë janë djem e vajza të rinj me shkolla të larta”, tha ai.
Në këtë dalje Kokëdhima nuk mundi pa përmenduar edhe për votimin e e mandatit të tij javën e shkuar në parlament dhe për faktin që ai nuk ishte vënë në dijeni.
“Akuzat janë strategji shpifjesh Saliut e pafund dhe nuk më kanë paraqitur asnjë fakt të vetëm që unë të kem përvetësuar, asnjëherë në jetën time dhe në rastin konkret, përveç shpifjeve dhe sharjeve”, thotë ai, duke theksuar se nuk ka përfituar fonde pas marrjes së mandatit të deputetit.
