Ka zgjedhur rrjetin social “Facebook”, 37-vjeçarja nga Durrësi për të kërcënuar me mesazhe jo vetëm Rudina Magjistarin, por edhe shumë VIP-a të tjerë të medias.
Mësohet se ajo është beqare dhe “ka pasur kontakte” me personazhe të ndryshëm.
Gruaja nga Durrësi ka kërkuar të takohej me shumë nga këto personazhe mediatike dhe televizive, mes të cilëve edhe Rudina Magjistari. Pasi nuk ka marrë përgjigje ose ka marrë refuzimin e personazheve të cilëve u shkruante, gruaja nga Durrësi ka nisur kërcënimet.
Ajo ka shkruar mesazhe me fjalë banale dhe të pista e më pas ka kërcënuar personazhet me të cilët kontaktonte në rrjetet sociale. Gruaja mësohet se ka kërcënuar, ka fyer dhe ka sharë edhe personazhe të tjerë të njohur në publik apo edhe fëmijë politikanësh të ndryshëm.
Ajo në disa prej mesazheve pretendon se një mjek në Itali, me anë të një vale elektronike i ka futur në distancë diçka në tru dhe e torturon vazhdimisht. Gruaja, e cila duket se kërkon të jetë në komunikim me personazhet që sheh në televizor, ka hapur disa profile në “Facebook” dhe i përdor sipas rastit.
Në shumicën e mesazheve që dërgon ajo përdor emrin e saj, duke bërë kërcënime në “ëall”in e personave që u drejtohet. Kur kjo nuk ka qenë e mundur, gruaja ka shkruar mesazhe në “inbox”. Ajo niste peticione, që sipas saj i drejtohen të gjithë shoqërisë, politikanë, gazetarë apo ambasadorë. Tri ditë më parë ka qenë Rudina Magjistari, e cila ka bërë padi në Polici ndaj 37 vjeçares nga Durrësi, duke kërkuar ndjekjen penale ndaj saj. Në një prononcim për gazetën “Panorama”, Magjistari ka treguar se ka marrë kërcënime për një periudhë 2vjeçare në adresën e saj në “Facebook”. Moderatorja thekson se një e çmendur e ka kërcënuar dhe e ka fyer, fillimisht në “inbox”in e saj personal dhe më pas në pjesën ku mesazhet janë publike. Sipas Rudina Magjistarit, ajo e ka toleruar shumë dhe ka pritur gjatë për ta denoncuar, pasi ajo ka kohë që i shkruan dhe e bezdis me mesazhe e komente. “Ajo është fansja ime në fan page Rudina Magjistari. Emrin nuk ia di. E ndërron shpesh profilin. Është i njëjti person që shkruan. Unë sa herë i bëj block, ajo hap profil të ri dhe shkruan. U kalua çdo lloj limiti dhe erdhi një moment që u detyrova të shkoj në Polici dhe t’i japin ata drejtim çështjes. Unë nuk vazhdoj më kështu”, ka thënë Magjistari.
