Belind Këlliçi, drejtues politik në Qarkun e Tiranës për PD, ka reaguar në rrjetet sociale lidhur me deklaratat e Kryeministrit Edi Rama, i cili në një shfaqje të turpshme, bëri krahasime mes kandidatëve të propozuar prej tij dhe kandidatëve për deputet të opozitës.
“Fjalët e Edi Ramës sot janë një turp i madh për politikëbërjen në Shqipëri dhe imazhin e vendit tonë.
E papranueshme që kryeministri të degradojë në gjuhë urrejtjeje dhe poshtërimi, me etiketime seksiste kundër zonjave kundërshtare politike të tij. E gjitha kjo vetëm dy ditë pas 8 marsit.
As fotot që kishe zgjedhur e as fjalori i rrugës nuk të bëjnë dot burrë, e më i trishtueshëm është fakti që sjellje të tillë e bëje përpara grave”, shkruan Këlliçi.
Në vijim ai thekson se kultura e Bullizmit në fushatën e Ramës sot ka qenë e turpshme.
“Sjellje të tilla dënohen në të gjithë botën dhe nuk janë pjesë e ligjërimit publik. Por mesa duket ky je ti dhe kaq di të bësh. Ke marrë fund”, shkruan Këlliçi.
