Vaksinimi kundë Covid-19 ka vijuar në Berat, ku nuk kishte si të mos ishte i pranishëm edhe Kryeministri Edi Rama.
Nga momenti që ka nisur procesi i vaksinave, Rama dhe ministrja e Shëndetësisë, Ogerta Manastirliu, kanë ndjekur procesin hap pas hapi, madje nëse ato nuk janë prezent nuk është çudi që procesi të mos nisë.
“Sot kemi filluar me 150 vaksinimet e para për bluzat e bardha, në polin tjetër të vaksinimit në Berat. Së bashku me vaksinat që do të kryejmë sot arrijmë në 10 mijë vaksinime, dhe zgjerohemi me vaksinimin e personelit shëndetësor, të cilin tashmë e kemi shtrirë tek mjekët dhe infermierët e kujdesit parësor, po përfundojmë spitalet dhe brenda 15 marsit përfundojmë angazhimin tonë për vaksinimin e gjithë personelit mjekësor dhe vijojmë shtrirjen tek moshat e treta, mbi 80 vjeç, dhe kështu me radhë”, tha Manastirliu.
Kryeministri Edi Rama deklaroi se në periudhën e pranverës do të nisi fushata intensive e vaksinimit ndaj COVID19.
“Duhet të përgatitemi për të patur një rrjet kapilar, të përfshijmë edhe ushtrinë edhe studentë të infermierisë në mënyrë që gjithë këtë periudhë të pranverës ta kthejmë në një peridhë vaksinimi intensiv dhe t’ja dalim që të kemi një pozicion shumë lart në klasifikimin e vendeve për nga efiçenca e bërjes së vaksinës”, tha Rama.
Nuk dihet pse ky proces nuk ecën me ritme më të shpejta tani dhe Rama pret ardhjen e pranverës. Por ndoshta edhe këtë proces, Rama e ka të lidhur me 25 prillin, ashtu sikundër po ndodh edhe me ndërtimin e spitalit rajonal në Fier, ku gjithçka lidhet me zgjedhjet, dhe jo me cilësinë.
