Nga Boldnews.al
Jorgo Goro, kryetari i Bashkisë së Himarës, vijon t’i japë tenderat e majmë nënës së Elton Rondo, i cili ka qenë një nga personat e besuar të Goros, gjatë kohës që ka qenë jurist në këtë institucion.
Bashkë kanë hartuar dhjetëra procedura tenderuese përgjatë 7 viteve që Eltoni ka punuar në Himarë. Madje, sipas denoncimeve të mëparshme, nëna e tij, Fotina Rondo, ka fituar tendera edhe gjatë kohës që djali i saj ka qenë jurist.
Janë rreth 15 tendera që Fotina, me kompaninë COGREEN dhe ELEKRI, ka fituar në Himarë, duke ngritur hije të forta dyshimi se gjithçka ka qenë e paracaktuar, madje në konflikt të hapur interesi. Ndërkohë, sipas dokumenteve të reja që disponon BoldNeës, kompania COGREEN po vijon të fitojë tendera nga Bashkia e Himarës, madje me procedura tepër të dyshimta.
Disa ditë më parë, Bashkia e Himarës shpalli fituesin e tenderit për Ujësjellësin e fshatit Tërbaç. Në lotin 1 fitues ishte kompania COGREEN, ndërkohë Jorgo Goro vijoi me procedurat e lotit 2.
Fondi për këtë tender ishte 16,461,437 lekë pa TVSH. Sipas dokumenteve, në tender kanë marrë pjesë 4 kompani, ku njëra prej tyre “KARL GEGA KONSTRUKSION” shpk nuk paraqiti ofertë. Kujtojmë se kjo kompani, ka bashkëpunuar edhe disa herë të tjera me COGREEN në Himarë. Kompania e dytë ishte e znj. Fotina Rondos, COGREEN, me vlerë 16.444.444, lekë ose rreth 99 % të fondit limit. Ofertën më të ulët e kishte “BOSHNJAKU. B” me 14.853.010 lekë.
E fundit ishte “EREDA” shpk me 16.455.050 lekë, shumë afër fondit limit. Natyrisht, më këto tendera, nuk kanë rëndësi ofertat e paraqitura, por dokumentet shoqëruese. Dhe, duke qenë një “ujk i vjetër” në këtë bashki, Elton Rondo i ka “plotësuar” të gjitha kushtet e vendosura nga ish kolegët (eprorët apo vartësit). Sipas dokumenteve, oferta më e ulët është s’kualifikuar, pasi “BOSHNJAKU” nuk ka punë të ngjashme në 3 vitet e fundit. Normalisht, punë të ngjashme kishte firma COGREEN, që kishte fituar edhe lotin 1.
Disa muaj më parë, mediat denoncuan vendimmarrjen e kryetarit të Bashkisë së Himarës, Jorgo Goro, për t’i dhëmë dhjetëra tendera publikë firmave të nënës së ish juristit. Elton Rondo ka punuar në këtë bashki plot 7 vite, ndërkohë që nëna e tij fitoi plot 13 tendera. Por, edhe pas largimit nga puna, nëna e tij ka vijuar të fitojë punë publike. Edhe për lotin 1 të Ujësjellësit të Tërbaçit, COGREEN nuk dha ofertën më të ulët. Por, u shpall fituese. E njëjta skemë edhe për lotin 2, ndërsa shuma që Fotina dhe djali i saj Eltoni kanë fituar në Bashkinë e Himarës shkon në mbi 3 milionë euro.
