Kreu demokrat duket se ka përmbyllur marrëveshjet me aleatët e tij për zgjedhjet e 25 prillit. Ndërsa më herët u arrit marrëveshja me kreun e PDIU-së, Shpëtim Idrizi, pasditen e sotme, kreu demokrat arriti marrëveshjen me republikanët e drejtuar nga Fatmir Mediu.
Ky i fundit pas takimit tha se ende nuk është përcaktuar se në cilin qark do të kandidojë, por shtoi se është i gatshëm të jetë në cilindo qark ku mund t´i shtojë qoftë edhe njv votë opozitës.
“Kemi mirëkuptimin për të dalë me lista dhe program të përbashkët. Konkurrimet duhet të përfshijnë njerëz dhe partitë politike që të maksimalizojnë votën e opozitës dhe qytetarëve shqiptarë për të përmbysur këtë regjim të korruptuar. Më pas se ku janë zonat dhe si do të funksionojë, është pjesë e një diskutimi që vazhdon.
Jam i gatshëm të kandidoj kudo, por nuk e kemi përcaktuar vendin tim as të tjerëve. Folëm për për pozicionet që ka PR në raport me peshën e saj elektorale dhe më pas do vlerësojmë edhe figurat që duhet të kandidojnë në emërt të PR, koalicionit apo PD”, tha Mediu.
I pyetur se sa mandate do ketë PR në listë, Mediu tha se “nuk ka mandate PR, por vetëm kontribute dhe konkurrime, nuk ka vende të sigurta, kjo është një nga gjerat që duhet ta shohim me qartësi si opozitë. PR ka sipas peshës elektorale në çdo qark duke nisur nga Kukësi, Dibra. Çështja është se si votat e PR të kthehen në vota pozitive në mandate të opozitës”.
Me shumë gjasa, Mediu do të kandidojë në Tiranë ose në Fier, ndërsa Idrizi ka shprehur preferencën për Tiranën.
Ndërkohë në listat e deputetëve të PD-së në qarkun e Tiranës do të kandidojë edhe Dashamir Shehi, ndërsa kreu i PAA-së, Agron Duka, do të jetë në Durrës. Për kreun e PDK-së, Nard Ndoka, dakordësuar është arritur për qarkun e Shkodrës, ndërsa Vangjel Dule në Korçë.
Bazuar marrëveshjeve, drejtuesit e 5 partive të vogla opozitare, do të jenë në listat fituese, apo sikundër konsiderohen vendet preferenciale, ndërkohë që në qarqe të tjera, emrat që do të propozojnë do të jenë pjesë e listës dhe hyrja ose jo në Kuvend do të varet nga votat që ato do të marrin individualisht.
