Kryeministri Edi Rama paralajmëroi sot marrjen e masave të reja kufizuese lidhur me vënien nën kontroll të pandemisë, por vuri theksin te zbatimi i masave aktuale.
Rama tha se nesër do të ketë një mbledhje të Komitetit Teknik ku mund të propozohen masat e reja, por ajo që thonë ekspertët është zbatimi i masave aktuale.
Kryeministri paralajmëroi se do të vendosen sanksione edhe ndaj partive politike apo kujdo që organizon takime të tilla në kundërshtim me masat anti-Covid.
Rama tha se do të ndëshkohen personalisht ata që organizojnë takimet, duke nisur nga Presidenti, politikanët, ministrat. Sipas tij, gjithashtu ministri i Brendshëm do të angazhohet për ti kërkuar llogari çdo drejtuesi policie, në territorin e të cilit mbahen takime të tilla, në shkelje të ligjit dhe masave, dhe nuk ka ndëshkim për organizatorët.
“Jeta nuk mund të ndalohet. Vërtet masat mund të ulin shifrat, por ato nuk e ndalojnë virusin. Virusi do të marrë fund kur të përfundojë vaksinimi”, tha Rama. Sipas tij, e rëndësishme në këtë situatë është zbatimi i masave ekzistuese veçanërisht nga tregtarët.
Rama tha se shifrat do të ishin edhe më të larta, nëse nuk do të ishin marrë ato masat minimale për festat e fundvitit.
“Shifrat aktuale janë pasojë e mosrespektimit të masave, por edhe atyre fundjavave në Korçë dhe qytete të tjera të vendit, që nisen në grupe dhe nuk respektojnë asnjë masë”, tha Kryeministri.
Ai tha se edhe partitë politike po bëjnë takime elektorale duke shkelur të gjitha rregullat dhe masat anti-Covid.
