Policia e Tiranës ka vënë në pranga një 19-vjeçar, i shpallur në kërkim për veprat penale “Vrasja me dashje” e mbetur në tentativë dhe “Armëmbajtja pa leje”.
I arrestuari është Kevin Cungu, banues në Tiranë, vëllai i Markelian Cungut, i skeduar për vjedhje që në moshë të mitur.
Ai është arrestuar për ngjarjen e ndodhur në shtator të 2020, ku plagosi me armë zjarri shtetasin Rexhep Gjeli (Xhekja).
“19-vjeçari ishte person i shpallur në kërkim, pasi Gjykata e Tiranës i ka caktuar masën e sigurisë “Arrest në burg”, për veprat penale “Vrasja me dashje” e mbetur në tentativë dhe “Armëmbajtja pa leje”.
Ky shtetas, më datë 11.09.2020, në rrugën “5 Maji” pas një konflikti të çastit, për motive të dobëta, ka qëlluar me armë zjarri shtetasin R. Gj”, thuhet në njoftimin e policisë.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
