Nënkryetari i LSI-së, Petrit Vasili, e konsideron si kritike situatën e pandemisë në vend, ndërsa akuzon Qeverinë se ka lënë në mëshirë të fatit mijëra qytetarë!
Referuar shifrave të deklaruara zyrtarisht mbi rastet e reja, ku për herë të parë u evidentuan mbi 1000 të prekur, Vasili tha se ka edhe me mijëra raste të tjera anë e mbanë Shqipërisë, që janë nëpër banesat e tyre dhe të cilët po vuajnë sëmundjen pa ndihmë mjekësore, pa këshillim mjekësor, në improvizim të plotë, duke u përpjekur të mbijetojnë.
“Sistemi shëndetësor dhe qeveria po sillen sikur është një situatë normale. Ju e keni parë që askush nuk flet më për këtë situatë kritike të mijëra e mijëra qytetarëve, e mijëra e mijëra familjarëve të tyre, të cilët janë të detyruar që t’u qëndrojnë pranë e t’ japin shërbim atyre.
Qeveria dhe kryeministri tregojnë vetëm përralla, me trasta vaksinash, pasi janë praktikisht trasta, të ashtuquajtura sekrete. Disa përralla që nuk i hyjnë në punë njeriu, e që kanë të bëjnë me një grusht prej disa qindra njerëzish. Ndërkohë që në një ditë të vetme verifikohen zyrtarisht 1007 raste dhe mijëra të tjerë të pa verifikuar.
Sigurisht që sistemi dhe strategjia kanë rënë, qartësisht kanë rënë. Kërkohet një qasje krejtësisht e re. Të gjitha masat e ndërmarra nuk kanë prodhuar rezultat. Shifrat flasin dhe e tregojnë këtë gjë. Nga të qëndruarit pasiv duke pritur e duke luajtur përditë me shifrat, kërkohet një strategji aktive, ku të gjithë mjekët e familjes, i gjithë sistemi, të interesohet për qytetarët. Çdo mjek familjeje ka qytetarët e tij që mbulon, e duhet të jetë proaktiv, duhet të komunikojë me ta për të kuptuar sesi është gjendja e secilit prej tyre”, tha Vasili.
Sipas tij, i gjithë sistemi shëndetësor duhet të jetë në alert të vërtetë, si asnjëherë më parë në këto 11 muaj, pasi situata po rrëshqet në mënyrën më të rrezikshme të mundshme.
“Indeksi i pozitivitetit është rreth 27%, disa herë më i lartë nga ato nivele të pranueshme që OBSH flet e ku të gjithë vendet e rajonit përqark i kanë të tilla pra shumë më të ulëta.
Praktikisht qeveria duhet të ngrihet e tëra në këmbë, të marrë përgjegjësitë, të lërë turpet dhe karagjozllëqet propagandistike, të lërë krahët e zhveshur të kryeministrit që bën sikur bën vaksina e të ndihmojë mijëra shqiptarë, të cilët po dergjen nën peshën e sëmundjes dhe nën peshën e varfërisë”, tha ai.
