Kosova vazhdon të ketë numër të lartë infektimesh, edhe pse ka marrë masa kufizuese. Numri i të infektuarve vazhdon të rritet, por ka pasur persona që janë infektuar për së dyti. Edhe pse disa raste janë të lehta, disa të tjera nuk janë njësoj me ato të parat.
Drejtoresha e Klinikës Infektive QKUK në Kosovë Lindita Ajazaj-Berisha thotë: “Gjatë këtyre kohëve të fundit kemi pasur edhe raste që na kanë ardhur për herë të dytë me Covid-19 të cilët kanë qenë gjatë muajve të verës të konfirmuar me PCR-pozitiv dhe tani përsëri kanë qenë Covid- pozitiv, në mesin e tyre kemi pacientë të cilët në atë kohë nuk kanë pasur manifestime klinike ose kanë pasur manifestime të lehta, ndërsa tani kemi disa prej rasteve që edhe duhet të spitalizohen”.
Ajo u bën thirrje politikanëve para zgjedhjeve të 14 Shkurtit që të tregojnë kujdes, duke shmangur tubimet me grumbullime njerëzish, ndërsa apelon që të vijohen të respektohen masat.
