Taulant Balla, kreu i deputetëve socialistë, u shfaq sot në foltoren e Kuvendit, me një show duke akuzuar PD dhe LSI se kanë kundërshtuar votën e emigrantëve në zgjedhjet e 25 prillit.
Balla tha se është e turpshme që PD-LSI nuk pranojnë votimin me postë, ndërsa shtoi se ky votim dha rezultat shumë pozitiv në SHBA dhe do e japë edhe në Kosovë në zgjedhjet e 14 shkurtit.
“Është detyrim i KQZ të zbatojë Kushtetutën dhe Kodin Zgjedhor për dhënien e mundësisë shqiptarëve që jetojnë jashtë vendit të votojnë. Vota me postë edhe në SHBA funksionoi më së miri.
Edhe në Kosovë në 14 shkurt do të funksionojë më së miri. Nuk gjej arsyeje pse demokratët e paepur, bashkë me patericën LSI, nuk pranoni që vota e shqiptarëve jashtë vendit të mundësohet, është një pikë turpi që e kundërshtoni, por i bën nder zgjedhjeve në Shqipëri”, tha ai.
Në fakt në SHBA votat me postë u kontestuan dhe ish-Presidenti amerikan Donald Trump ngriti dyshime të forta lidhur me manipulimin e tyre, gjë që ndikoi edhe në rezultatin zgjedhor.
E ndërsa Balla akuzon PD-LSI për bllokimin e votës së emigrantëve, kreu i KQZ, Ilirjan Celibashi hedh poshtë një variant të tillë, duke shtuar se asnjë nga palët nuk po e bllokon procesin.
Celibashi tha se nëse një nga palët ka dyshime lidhur me procesin, atëherë ne nuk mund të dakordësohemi.
“Është një çështje komplekse, për të cilën ne duhet të dakordësohemi dhe të gjejmë mënyrën e pranueshme nga të gjitha palët”, tha Celibashi.
Por përtej çdo krahasimi, në Shqipëri, votat e emigrantëve po shihen si një hambar nga ku qeveria të mund të manipulojë procesin. Kjo për faktin se Posta Shqiptare drejtohet nga një ish-kandidat për deputet i Rilindjes, duke mos afruar asnjë lloj besueshmërie apo garancie se këto vota do të shprehin realisht vullnetin e emigrantëve.
Veç kësaj, nga ana e vetë socialistëve u kërkua që emigrantët të deklaronin adresën e tyre të banimit në Zyrat e Gjendjes Civile, që sërisht kontrollohen nga Rilindja. Dhe përsa kohë ngrihen dyshime dhe akuza për manipulimin e listave zgjedhore brenda vendit, në rastin e emigrantëve do të ketë një shumëfishim dyshimesh.
Në fillim të janarit, Komisioni Qendror i Zgjedhjeve publikoi dy variantet zyrtare për krijimin e listës së votuesve nga jashtë vendit.
I pari parashikon që emigrantët shqiptarë që duan të ushtrojnë të drejtën e votës nga shteti ku jetojnë, duhet të bëjnë regjistrimin e adresës së tyre nëpërmjet portalit qeveritar, “e-albania”.
Pas regjistrimit të adresës së tyre, emigrantët mund të kërkojnë që emri i tyre të futet te lista e shqiptarëve që do të votojnë jashtë vendit dhe për pasojë, emiri i tyre hiqet nga listat e votuesve në Shqipëri. Dhe të gjitha këto procedura, KQZ parashikon që të bëhen brenda datës 16 mars për zgjedhjet parlamentare të 25 prillit.
Varianti i dytë parashikon që procedurën e regjistrimit ta bëjë vetë Komisioni Qendror i Zgjedhjeve nëpërmjet një sistemi të posaçëm elektronik, i cili do të përpunojë të dhënat që vijnë nga Regjistri Kombëtar i Gjendjes Civile.
Brenda datës 11 mars duhet të bëhet pranimi i kërkesave për regjistrim jashtë vendit dhe deri më 16 mars, shqiptarët që kanë kërkuar të votojnë nga jashtë Shqipërisë do të hiqen nga listat e votuesve brenda vendit.
Këto dy propozime janë hapat e para për të mundësuar votën e emigrantëve dhe puna për këtë proces është ende e madhe pasi KQZ nuk ka specifikuar ende se si do të kryhet ky votim. /Boldnews/
