Është shtyrë për të 56-ën herë rradhazi procesi gjyqësor kundër Emiljano Shullazit dhe bashkëpuntorëve të tjerë të tij, në Gjykatën e Posaçme të Apelit në Tiranë.
Procesi gjyqësor që ishte planifikuar të zhvillohej ditën e sotme është shtyrë, për shkak të mos paraqitjes së dy avokatëve mbrojtës.
Pritet që seanca e rradhës të zhvillohet në 10 shkurt 2021. Procesi gjyqësor po shtyhet në mënyrë të vazhdueshme, duke u kthyer në një “telenovelë” me shumë seri, ku shkak i shtyrjeve herë janë bërë avokatët mbrojtës dhe herë gjyqtarët e shkarkuar nga vettingu.
Një javë më parë, lidhur me këtë çështje u kërcënua me telefon avokati i Shullazit, Vladimir Meçe, i cili tashmë ka depozituar kallëzim penal në polici.
Pesë të pandehurit, akuzohen nga prokuroria për “Shtrëngim me anë të kanosjes me qëllim marrjen e pasurisë”, kryer në bashkëpunim në formën e “Grupit të organizuar kriminal”, “Mbajtjes pa lejë të armëve” dhe “Prodhim e shitje të lëndëve narkotike”.
Biznesmeni Ylvi Beqja, ka treguar në gjykatë se përmes presioneve dhe kanosjeve të vazhdueshme i ka dhënë Emiljano Shullazit dhe anëtarëve të grupit të tij, shumën prej mbi 560 mijë euro. Por nga kjo shumë, prokuroria mundi të faktojë, vetëm 5 tërheqje me çek në bankë.
