Në seancën e radhës gjyqësore për vrasjen e Liridona Ademaj, e mbajtur në Prishtinë, është paraqitur një nga dëshmitë më tronditëse që lidhen me rastin, rrëfimi i djalit të saj.
Gjatë fjalës përfundimtare, prokurorja Javorka Perlinqeviq zbuloi se djali i madh i viktimës, gjatë një vizite në Suedi dhe në prani të një psikologeje, kishte përshkruar momentin e ngjarjes me fjalët: “Hajduti i futi dorën dhe i bëri mamasë bam”. Ky deklarim, sipas Prokurorisë, përforcon versionin se vrasja ishte inskenuar si grabitje.
Prokuroria Themelore në Prishtinë ka kërkuar dënim maksimal, burgim të përjetshëm, për Naim Murseli, bashkëshortin e viktimës, si dhe për Granit Plava dhe Kushtrim Kokalla. Sipas aktakuzës, Murseli dyshohet se ka organizuar dhe planifikuar vrasjen për motive financiare dhe morale, duke e paraqitur atë si grabitje, ndërsa Plava akuzohet se e ka kryer vrasjen dhe Kokalla se ka ndërmjetësuar lidhjen mes tyre.
Në seancë ka dëshmuar edhe vëllai i viktimës, Leonard Ademaj, i cili ka deklaruar se vrasja ishte e organizuar nga Murseli në bashkëpunim me Kokallën, ndërsa Plava ishte ekzekutori.
Vrasja e Liridona Ademajt ndodhi në nëntor të vitit 2023 dhe ka tronditur opinionin publik, duke nxitur reagime të shumta për drejtësi dhe dënim maksimal për autorët.
Seanca për shpalljen e vendimit përfundimtar ndaj të akuzuarve është caktuar për datën 21 prill, në orën 13:30.
