Kuvendi votoi dje marrëveshjen me kompaninë Pfizer, ndërsa deputetëve nuk iu vu në dispozicion një draft, me pretendimin se përbën sekret shtetëror.
E ndërsa sot qytetarët bazohen vetëm te fjala e Kryeministrit mbi sasinë prej 500 mijë vaksinash që do të vijnë në Shqipëri, nuk dihet asgjë mbi çmimin me të cilat këto vaksina janë blerë, koha kur do të vijnë dhe detaje të tjera, që për Kreun e Qeverisë duhet të mbeten sekret.
Sot në konferencën për mediat, ai tha se Qeveria nuk bën publike kontratën me Pfizer pasi ajo mbrohet nga sekreti tregtar.
Rama u shpreh se do të dëshironte shumë të bënte publike kontratën, por la të nënkuptohej se kjo i ishte kërkuar nga kompania.
“Kontrata me Pfizer është e mbrojtur në të gjithë botën nga sekreti tregtar. Unë kisha dëshirë ta bëja publike, por kontrata është kontratë. Nëse gjeni një vend në BE që e ka bërë publike, ne do të bëhemi vendi i dytë që do ta bëjmë publike këtë kontratë”, tha Rama.
Gjithsesi, gjatë fjalës së tij, Raa tha se synohet që procesi i vaksinimit të popullatës, në rastin më të mirë të realizohet brenda 14 muajve, edhe pse me ritmet e deritanishme, ky proces po ecën me ritme shumë të ngadalta.
“Përjashto Serbinë dhe Shqipërinë asnjë vend nuk ka filluar me vaksinimin. Të gjitha vendet kanë parapaguar përmes Covax, një platformë për t’iu dhënë mundësinë të gjithëve të kenë akses te vaksina, por që ende nuk është hapur.
Flitet që do të nisë së shpejti. Nga ana tjetër, ne kemi ndeshur në vetë të parë vështirësinë e marrëdhënieve bilaterale për shkak sepse ka një element tjetër që vendet për të bërë marrëveshje me njëra-tjetrën, për të dhuruar apo shitur duhet që patjetër të marrin leje nga Pfizer. Përndryshe, ky transaksion është i pamundur. Kështu është e nënshkruar dhe në marrëveshjen që kemi arritur dhe që do ta ratifikojmë në Kuvend. Plani i vaksinimit ka 3 skenarë, më ambiciozi është vaksinimi i të gjitha kategorive, në 14 muaj. Skenari i mesëm ka një agjendë 18-mujore dhe i treti 24 muaj. Ne do të bëjmë gjithçka për të shkuar sipas skenarit më ambicioz”, tha Rama.
