Kreu demokrat Lulzim Basha akuzoi Qeverinë se ka dështuar lidhur me pandeminë. Basha tha se nëse muaji i parë na kapi të papërgatitur, çfarë u bë në muajt e tjerë.
“As pajisje për të mbrojtur mjekët nuk u siguruan, kam takuar mjekë që më kanë thënë se nuk kanë pasur mjete mbrojtëse ndaj pandemisë”, tha Basha në një bashkëbisedim me studentët e mjekësisë.
Sipas tij, PD ka propozuar anullimin e koncensioneve dhe financimin e të gjithë hallkave të sistemit shëndetësor.
“Jemi kthyer në një laborator që prodhojmë mjekë dhe infermierë, të cilët largohen drejt Gjermanisë dhe Europës”, tha Basha, duke shtuar se sistemi ka nevojë për një reformim të plotë, që nis me mjekët e familjes, me pagesat për cilindo që është pjesë e sistemit shëndetësor.
Ai tha se kemi humbur shumë mjekë për shkak të mungesës së mjeteve mbrojtëse, ndërsa akuzoi Qeverinë se brakisi mjekët dhe shpërdoroi muajt e verës, kohë kur mund të ishte mbrojtur sistemi nga pandemia.
Sipas tij, për çfarë duhet një qeveri, e cila nuk garanton asnjë gjë. “A ka gjë më të rëndësishme për qeverinë se të investojë për arsimin në tërësi dhe në vecanti për mjekët? Nuk ka asnjë hapësirë për korrigjim, duhet ndryshim”, tha Basha.
