Nga Boldnews.al
Ish-kryeministri Pandeli Majko, i cili prej pak kohësh drejton Ministrinë e Shtetit për Diasporën, vazhdon te qëndrojë jashtë debateve që shqetësojnë shqiptarët.
Ai është aneksuar edhe nga Rilindja, duke i besuar një ministri pa portofol. Majko ka “kyçur” gojën për fenomene që shqetësojnë gjithkënd, megjithëse është deputet në zemër të kryeqytetit, ish-Bllokun dhe Tiranën e Re.
Që nga tërmeti, Covidi, protestat e më pas vrasjet shtetërore, Majko ka qenë mjaft indiferent, duke vijuar punën për diasporën. Por, edhe shifrat e fundit po dekurajojnë çdokënd, pasi më shumë se 1/3 e shqiptarëve janë jashtë vendit.
Dhe, Majko kishte detyrën për ti rikthyer, apo për ti bashkuar. Por, shifrat rriten ditë pas dite, muaji pas muaji dhe vit pas viti. i gjendur në këto kushte, Majko po merret me tendera për lojëra “mos u nxeh” apo së fundmi edhe për “like” dhe “share”.
Sipas dokumenteve që disponon Boldnews, Fondi Shqiptar për Zhvillimin e Diasporës, ka bërë një tender me objekt “shërbim promovimi për të rritur numrin e përfitueseve dhe shikueshmërinë online të gazetes “Diaspora Shqiptare”. Fondi është rreth 8 milionë lekë të vjetra, ku fituesi do të ketë një deryrë që ti bëjë “share” dhe “like” kësaj gazete që ta shohin shqiptarët nëpër Botë. Mësohet se synohet promovim në rrjetet sociale, me audiencë në Evropë, Kanada, Shtetet e Bashkuara të Amerikës dhe Australi.
Pandi Majko, nëpërmjet agjencive që në në varësi, po synon që të thithë një audiencë nga mosha 18-60 vjeç. Ndërkohë që fokusi do të jetë te industria, arkitekturë & inxhinieri, arte, sport, media, shërbime sociale, matematikë & informatikë, shëndetësi.
Fushata e parë do të jetë për audiencën ku do të synojë rritjen e trafikut (lexueshmerisë) në ëebsite nëpërmjet klikimeve në rrjete sociale. Përmbajtja do të jetë tekst, foto dhe video. Kjo fushatë do të zgjasë vetëm 10 ditë, deri në 31.12.2020. Majko synon minimalisht 100.000 klikime.
Ndërkohë, fushata e dytë është për rritjen e trafikut (lexueshmerisë) në rrjetet sociale si facebook & twitter & google ads, etj… Kjo fushatë do të jetë 10 ditë në total, deri me 25.12.2020 dhe do synohet minimalisht 50. 000 ndjekës/lexues të shtuar.
