Dy banorë të fshatit Libofshë të Fierit janë arrestuar nga Policia në aksin Pogradec – Korçë, pasi në makinën e tyre u gjetën 4 kg kanabis që kishin në plan ta shisnin. Policia ishte vënë në ndjekje të dy personave që rezultojnë të dënuar parë të dënuar.
Policia e Korçës njoftoi se nën drejtimin e Prokurorisë të Rrethit, ka goditur një rast të prodhimit dhe shitjes së narkotikëve. Si rezultat i të cilit u bë kapja dhe arrestimi në flagrancë i E.M, 44 vjeç, banues në Libofshë të Fierit, i dënuar më parë për krime kundër jetës të kryera me dashje dhe P.Sh, 50 vjeç, edhe ai nga Libofsha,i dënuar për ndihmë për kalim të paligjshëm të kufijve.
Forcat e Policisë, pas informacioneve të siguruara në rrugë policore se dy persona me një “Volkswagen Polo” do të transportonin lëndë narkotike, kanë organizuar shërbimet përgjatë aksit rrugor Pogradec – Korçë dhe kanë bërë të mundur lokalizimin e mjetit me të cilin po udhëtonin ata të dy.
Në afërsi të Qafë-Plloçës, gjatë kontrollit në mjet, iu gjetën 4 kg kanabis, ndarë në pako.
Dosja e tyre i kaloi Prokurorisë Pranë Gjykatës të Rrethit Gjyqësor Korçë, për veprën penale “Prodhimi dhe shitja e narkotikëve” kryer në bashkëpunim.
