Sot, është dita e dytë që qytetarët e Durrësit qëndrojnë me orë të tëra në radhë përpara prefekturës.
Banorët, shtëpiat e të cilëve janë dëmtuar nga tërmeti i 26 shtatorit, kanë zënë radhë që në orët e para të mëngjesit për të dorëzuar dokumentacionet e nevojshme për të përfituar dëmshpërblim.
Deri më tani që ora shënon 10:00 e së shtunës, zyra përkatëse nuk është hapur, duke krijuar radhë të gjata dhe shqetësime te qytetarët. Ata dënojnë mungesën e informacionit nga perfektura.
“Kemi ardhur që në orën 5 këtu dhe nuk na kanë dhënë asnjë informacion. Duan të na infektojnë me virus këtu. Çfarë bëhet këtu? Të na thonë të paktën të ikim. Të na thonë të vërtetën që do aplikojmë apo jo”, tha një prej qytetarë për mediat.
Qytetarët thonë se kanë humbur shpresat për një zgjidhje, ndërkohë që vijojnë të qëndrojnë të presin për dikë që t’u marrë emrin.
“Me këtë milet që është mbledhur këtu… Do rrimë por shpresa nuk kemi. Nuk vjen njeri të na shkruaj emrat. As nuk na japin përgjigje, asgjë. Vetëm rrijmë në rradhë dhe zihemi me njëri-tjetrin. Kam që dje këtu”, thotë një tjetër.
