Të shtunën në Tiranë u mbajt protesta e katërt për vrasjen e të riut Klodian Rasha nga efektivi i Policisë së Shtetit. Por dje policia, me një strategji ndryshe nga ajo e ditëve më parë, nuk lejoi grumbullimet, duke hedhur gaz lotsjellës, ndërsa trupat Shqiponja dhe ato të FNSH, ndoqën nëpër rrugë të rinjtë protestues.
Policia bën me dije se vetëm një person është arrestuar, ndërsa 18 të tjerë janë vënë nën hetim nga policia e Tiranës.
Sipas policisë, i arrestuari është A.M, 21-vjeç, pasi në rrugën “Myslym Shyri”, është konstatuar duke protestuar në mënyrë të paligjshme, ku ka kryer veprime të dhunshme në drejtim të punonjësve të policisë, duke hedhur ndaj tyre sende të forta si gurë, lëndë piroteknike si dhe sende të tjera, ku nga kontrolli fizik, iu gjet dhe sekuestrua në cilësinë e provës materiale një sasi me lëndë të dyshuar narkotike e llojit kanabis.
Është bërë ndalimi i shtetasit të shpallur në kërkim A.Sh (T)., 33-vjeç, pasi është identifikuar nga pamjet filmike si pjesëmarrës i protestës të datës 09.12.2020 dhe sërish pjesmarrës i protestës të zhvilluar ditën e djeshme. Si dhe janë proceduar në gjendje të lirë 18 shtetas.
