Gaz lotsjellës dhe ujë me presion. Ndjekje nga pas të protestuesve, ndalime dhe dhunë. Është kjo skema që pvrdori sot policia, në ditën e 3 të protestave dhe revoltave të të rinjve, pas vrasjes së Klodian Rashës, nga një efektiv i repartit Shqiponja.
Ndryshe nga dy ditët e para të protestës, sot policia nuk ka lejuar grumbullime, madje që në minutat e para ka hedhur gazin lotsjellës dhe ujin me presion nga botet, duke shpërndarë grupin e protestuesve.
Më pas ndërhynin efektivët e Shqiponjave, policë civilë si dhe grupe të FNSH-së, që kanë ndjekur këmba këmbës protestuesit, një pjesë e konsiderueshme e të cilëve janë shoqëruar brenda pak orësh në komisariate.
Në dallim nga një ditë më parë, Policia nuk i ka dhënë kohë protestuesve të organizohen, duke i goditur njëherazi në disa pika, jo vetëm para Kryeministrisë dhe Ministrisë së Brendshme, por edhe në sheshin Skënderbej, rrugët e ish-Bllok, zonën rreth Tajvanit, rrugën Myslym Shyri dhe rrugicat që lidhin këtë rrugë me akset e tjera.
Kudo është hedhur gaz pa kursim dhe pa pyetu nëse ka familjarë, indiferentë ndaj protestës, apo të mitur në protestë.
Ndjekja e protestuesve ka vijuar deri te sheshi “Willson”, ku sërisht është hedhur ujë me presion dhe gaz lotsjellës.
