Policia e Shtetit ka reaguar përmes një deklarate lidhur me protestën qytetare të zhvilluar sot në Tiranë para Ministrisë së Brendshme dhe Kryeministrisë, ku qytetarët shprehën revoltën e tyre lidhur me ngjarjen e rëndë kriminale të vrasjes së 25-vje♪arit Klodian Rasha nga një efektiv policie.
Në deklaratën e turpshme të policisë, ngrihet shqetësimi për thyerjen e xhamave në disa nga dritaret e godinës së Ministrisë së Brendshme, ndërkohë që një efektiv policie qëlloi për vdekje një qytetar, i cili kishte thyer orën policore të shtetrrethimit.
“Tubimi i nisur pasditen e sotme para godinës së Ministrisë së Brendshme u përshkallëzua në veprime të dhunshme, duke thyer xhamat e Ministrisë së Brendshme dhe duke plagosur disa punonjës policie që ishin në shërbim, në ruajtje të institucionit.
Më pas, turma u drejtua në bulevardin “Dëshmorët e Kombit”, duke u përqendruar perpara Kryeministrisë. Ekstremistë të dhunshëm kanë hedhur sende të forta, gurë, pllaka, kapsolla e sende të tjera, duke plagosur 9 punonjës policie dhe duke shkaktuar dëme të mëdha materiale në bulevardin “Dëshmorët e Kombit” dhe në Sheshin Skënderbej”, thuhet në deklaratën e policisë.
Ndërkohë që nuk jepet asnjë informacion se sa qytetarë janë plagosur apo lënduar si pasojë e veprimeve të dhunshme të policisë, përdorimit të gazit lotsjellës apo ujit me presion ndaj tyre.
Policia thotë se si pasojë e plagëve të marra, 3 punonjës policie janë në gjendje më të rëndë në spital, pasi kanë dëmtime serioze në kokë dhe në trup, të shkaktuara nga sulmi me sende të forta nga protestuesit, ndërsa 6 punonjës policie janë në gjendje më të stabilizuar.
“Policia e Shtetit apelon për të gjithë protestuesit që të mos ushtrojnë dhunë ndaj punonjësve të Policisë dhe institucioneve, pasi cilido do të përballet me pasojat ligjore.
Policia e Shtetit iu bën thirrje organizatorëve, të cilët kanë bërë thirrje sot në rrjetet sociale për t’u grumbulluar në protestë, të marrin masa të menjëhershme për të ndaluar thirrjet për dhunë, pasi dhuna do të përballet me përgjigjen ligjore të Policisë së Shtetit.
Episodi i papranueshëm i vrasjes së një qytetari nga një punonjes policie, i cili po hetohet në gjendje arresti, nuk mund të përdoret si pretekst për të ushtruar dhunë të verbër, për të plagosur rëndë punonjësit e Policisë së Shtetit dhe shkatërruar pronën publike dhe private”, thuhet në deklaratë.
Ndërkohë që për ngjarje të tilla në disa nga vendet e BE-së apo edhe në SHBA, protestat qytetare kanë qenë nga më të fuqishmet, në Tiranë, policia e drejtuar nga Ardi Veliu, duket e shqetësuar për xhamat që janë thyer në disa nga godina. Ndërkohë nuk thuhet asnjë fjalë lidhur me gazin lotsjellës që u hodh ndaj protestuesve apo autobotin me ujë që u përdor para drejtorisë së policisë së Tiranës.
