Procesi i negociatave mes Bashkimit Europian dhe Shqipërisë e Maqedonisë së Veriut është stopuar. Kjo bëhet e ditur nga Komisioneri për Zgjerimin, Oliver Varhelyi, i cili nuk ka nguruar të shprehë zhgënjimin e tij për ndaljen e procesit.
“Të zhgënjyer që nuk mund të ecim përpara në kornizat e negociatave me Maqedoninë e Veriut & Shqipërinë, por shpresoj që në një periudhë shumë të shkurtër kohe do të jemi në gjendje ta bëjmë. Ne kemi nevojë për të ‘thyer’ bllokimin shpejt”, shkruan Komisioneri për Zgjerimin.
Sipas tij, kjo është e rëndësishme për Ballkanin Perëndimor dhe për BE.
Në vijim, Komisioneri për Zgjerimin thekson se me metodologjinë e rishikuar dhe Planin Ekonomik dhe të Investimeve ne kemi një dritare unike të mundësive për të çuar rajonin përpara dhe për të dhënë rezultate të prekshme.
“Ne do të vazhdojmë të punojmë për këtë qëllim”, shprehet ai.
Në fund të vitit pritej zhvillimi i konferencës së parë ndërqeveritare mes Shqipërisë, Maqedonisë së Veriut dhe Bashkimit Europian, por shpresat për një gjë të tillë u zbehën. Në rastin e Shqipërisë duket se ka ndikuar mosplotësimi i kushteve, për të cilat vetë Bundestagu përmes deputetëve të ndryshëm ka ngritur shqetësimin. Qeverisë Rama i janë renditur rreth 15 kushte, dy prej të cilave kanë të bëjnë me ngritjen dhe vënien në funksion të Gjykatës së Lartë dhe asaj Kushtetuese. Ndërkohë që renditen edhe 13 kushte të tjera, ku veçohet përballja me drejtësinë të personave të përfshirë në dosjet 339 dhe 184 mbi manipulimin zgjedhor në Durrës dhe Dibër.
