Kreu demokrat Lulzim Basha ka zhvilluar një tjetër takim me mjekë lidhur me situatën e pandemisë në vend. basha u shpreh se shëndeti i qytetarëve është mbi gjithçka, ndërsa shprehu mbështetjen për stafet mjekësore.
Mjeku Lutfi Lisha, në bashkëbisedim me Bashën, ka vënë theksin në vonesat që bëhen për vendosjen e diagnozave. Sipas tij, përsa kohë nuk ka një diagnozë nuk mund të ketë mjekim dhe më pas rimbursim të medikamenteve, sikundër ka premtuar Qeveria.
Ndërsa mjeku Leon Shpataraku tha se fluksi që kemi sot mund të shmangej nëse në lojë do të hynin spitalet rajonale.
“Nuk do të kishim këtë fluks nëse do të kishim nxjerrë mësime nga vala e parë e pandemisë”, tha Shpataraku. Sipas tij, mostestimi bën që drejt Tiranës të nisen edhe pacientë që s´janë të infektuar. Ai ka kërkuar vënien në funksion urgjentisht të spitaleve rajonale që kanë infrastrukturën dhe stafet e përgatitura mjekësore për përballimin e pandemisë.
Mjekja Edlira Beqiri tha se spitalet rajonale kanë infrastrukturën e nevojshme dhe është e pakuptimtë që të gjithë të infektuarit nga Covid të vijnë për trajtim në Tiranë.
Mjeku Gent Kasmi duke folur për testimet tha se kapacitetet shtetërore janë 1000-1300 testime në ditë.
“Ndërkohë që po shtohet pozitiviteti, numri i testimeve nuk ndryshon”, tha Kasmi.
