E ndërsa rastet me koronavirus po njohin rritje eksponenciale, sikundër ka një shtim të numrit të pacientëve që kërkojnë trajtim spitalor, por edhe numri i fataliteteve është shtuar, mjeku infeksionist Pëllumb Pipero shprehet se kjo pandemi do të jetë prezente edhe gjatë 2021.
“Mendoj se pandemia do të viojë edhe gjatë 2021, pavarësisht se vaksina mund të na ndihmojë shumë, por edhe ajo do kohën e saj.
Një pandemi, si kjo që ndodh njëherë në 100 vjet, ka ciklin e saj 2-3 vjet dhe mendoj se edhe gjatë vitit tjetër do të jemi duke luftuar me të”, tha Pipero.
Sipas tij, qytetarët duhet të tregohen të kujdesshëm të respektojnë masat dhe të qëndrojnë sa më pak në lokale.
“Nuk mundet dot që të rrish 4 orë me një kafe në lokal, kur dihet tashmë se ato janë vatrat kryesore të përhapjes së virusit jo vetëm në Shqipëri por edhe jashtë”, tha Pipero në studion e Abcnews.
Gjithashtu ai këshilloi qytetarët që të konsultohen me mjekun lidhur me rastet dhe të mos qarkullojnë recetat, sikundër ndodh në raste të ndryshme.
“Mundet që një pacient ta kalojë me vitamina, pra pa përdorur antibiotikët. Ka raste kur gjendja është më e rënduar dhe duhen medikamente të tjera, ndaj dhe çdokush duhet të konsultohet me mjekun dhe nuk duhet të ecë me teorinë që meqë dikujt i ka bërë mirë kjo recetë pse të mos e përdor edhe unë.
Unë do i këshilloja sa më shumë ujë, cajra dhe vitamina. Por edhe ecja i ndihmon shumë, bëhet fjalë kur personi nuk ka shfaqur shenjat. Këto janë mënyrat që ne duhet të rrisim imunitetin tonë”, tha Pipero.
Ai shtoi se ky virus ka treguar se gjendja fillon e përkeqësohet pas ditës së 7 apo 8, ndaj dhe nuk duhen përdorur medikamentet pa kriter që ditën e parë.
Lidhur me ri-infektimet, Pipero tha se kemi dy raste që kanë qenë të infektuar 4 apo 6 muaj më parë dhe sot janë infektuar sërisht.
“Janë në gjendje të lehtë, por janë pozitivë. Ndaj edhe ata që e kanë kaluar njëherë Covid-19 duhet të tregohen të kujdeshëm, pasi ne nuk e dimë se sa kohë na mbrojnë anti-trupat”, shtoi ai.
