Kreu i Grupit Parlamentar të PS, Taulant Balla, në një komunikim për mediat, pas përfundimit të mbledhjes me drejtuesit politikë të Qarqeve, u shpreh se Partia Socialiste do të vijojë punën e saj edhe gjatë mandatit të tretë.
“Ka pasur një raportim të çështjeve më të rëndësishme, përveç drejtuesve politik të qarqeve ishin edhe ministrat.
Vëmendja jonë është për njerëzit e thjeshtë dhe të zakonshme. Qasja jonë do të vazhdojë edhe për mandatin tjetër qeverisë. Ne vijojmë një komunikim të vazhdueshëm në çdo cep të territorit.
I bëj thirrje miqësore politikanëve të së keqes që të heqin dorë nga fyerjet e padrejta”, tha Balla.
Në vijim ai shprehu mbështetjen për të gjithë bluzat e bardha të vendit që janë në krye të detyrës.
Në lidhje me hedhjen nga ballkoni i spitalit Covid 2 të një pacienti, Balla tha se është dhënë një përgjigje nga spitali.
“Ajo që dua të them, përgjigjet që kanë ardhur nga qendra spitalore për rastin e fundit është përgjigjja e thjeshtë që mund të jepet. Ajo që më vjen keq është përpjekja e 4 politikanëve që mundohen të përdorin fatkeqësinë për llumin e tyre politik”, u shpreh Balla.
I pyetur a rrezikohen qytetarët nga Covid si pasojë e takimeve elektorale të PS, Balla tha se nuk ka ndodhur që ne të kemi takime pa maska. “Ju lutem tërhiqeni prapa atë që thatë. Nuk ndodh në asnjë takim tonin të ketë qytetarë pa maska”, tha ai.
Lidhur me faktin se në takime Kryebashkiaku Erion Veliaj shfaqet pa maskë, Balla tha se ai e ka kaluar Covid-19 dhe për disa muaj ka imunitet. Në fakt Akti Normativ i qeverisë që detyron qytetarët të mbajnë maskën në ambiente të hapura, nuk parashikon që ata që e kanë kaluar Covid të mos e mbajnë atë.
