Kreu demokrat Lulzim Basha u shpreh sot se ekipi i shëndetësisë pranë PD ka marrë një numër shumë të madh raportimesh nga familjarë me simptoma COVID dhe u refuzohet tamponi.
Sips tij, numri i të infektuarve që raportohet është shumë më i ulët se numri real i tyre, sikundër numri i fataliteteve, është më i lartë seç raportohet.
“Edhe transparenca për COVID është kthyer në funksion të propagandës. Vetëm në spitalin e Matit janë mbyllur disa pavione për shkak të përhapjes së infeksionit.
Sistemi shëndetësor po del jashtë funksioni për shkak të shpërthimit të infeksionit në çdo pavion.
Ky kolaps i sistemit është emergjenca më akute që kanë sot shqiptarët”, tha Basha.
Sipas tij, çdo përpjekje për të larguar vëmendjen nga kolapsi i sistemit shëndetësor është kriminal.
“I bëj thirrje qeverisë të ndalë rrjedhjen e fondeve për afera dhe t’i orientojë fondet drejt krizës shëndetësore.
Hapi 1, rritja e disafishtë e numrit të testimeve, pasi numri i ulët i testimeve është shkak kryesor pse shqiptarët po e humbin luftën me COVID-in”, tha ai.
