Nënkryetari i LSI-së, Petrit Vasili, tha sot se situata ekonomike në vendin tonë është në gjendje kritike. Sipas tij, Shqipëria është i vetmi vend që harxhon më shumë për PPP, ndërsa borxhi publik është në rritje.
“Situata ekonomike në Shqipëri është në gjendjen e saj më kritike. Për të kuptuar si shpërdorohen paratë tuaja, po ju jap një grafik që tregon se çfarë batërdie ka bërë Rama me PPP-të. Shqipëria është vendi që ka shifrat më të frikshme nga ana ekonomike se çdo vend tjetër evropian.
Presim që vitin tjetër të paguhen edhe 120 mln euro të tjera që do të dalin nga xhepi i shqiptareve. Shqiptarët paguajnë koncesione pa fund, qeveria merr borxhe pa mbarim”, tha Vasili
Për Vasilin, zgjidhja është largimi i qeverisë dhe kryeministrit Edi Rama.
“Me Rilindjen dhe Ramën perspektiva e vendit është zero. Marrja e vendimit të madh për ti larguar një sahat e më parë është i vetmi shpëtim i shqiptarëve”, tha nënkryetari i LSI.
