Ambasadori i BE-së Luigi Soreca është ndalur sot në Kukës, ku ka folur mes të tjerave dhe për aktualitetin politik në vendin tonë, si dhe për procesin e integrimit europian të Shqipërisë.
Sipas Sorecës, Shqipëria i ka plotësuar një pjesë të mirë të kushteve për integrimin, dhe se realizimi i një marrëveshje zgjedhore me konsensus është prioritet për BE-në.
“Ne kemi vite që flasim me Shqipërinë dhe BE flet me Shqipërinë. Vendimi i marrë në Mars për negociatat u mor në një moment të vështirë. Shumë kushte janë përmbushur dhe Shqipëria është shume afër plotësimit të të gjitha prej tyre. Kam mirëpritur vendimin e Presidentit dhe Parlamentit për nxjerrjen e dy vendeve vakante për Gjykatën Kushtetuese.
KLGJ duhet të bëjë vlerësimin dhe ky është një kusht që duhet te përmbushet në javet në vijim për fatin e konferencës së parë ndërqeveritare. Marrëveshja e 5 qershorit një hap i rëndësishem. Shqipëria shpresoj të bëjë segmentin e fundit me qëllim që komisioni të marrë vendimin për konferencën ndërqeveritare ndoshta në fund të këtij viti.
Ju e dini qendrimin e BE për reformën zgjedhore. Ne kemi punuar për marrëveshjen dhe u përmbush kushti për administratën zgjedhore. Ne kemi shprehur keqardhjen që mazhoranca vijon punën pa konsesus dhe është e rëndesishme që të gjendet konsensusi mes palëve.
Duhet të punojnë fort që zgjedhjet të jenë të lira dhe të ndershme”, është shprehur Soreca.
