“Kush bëhet palë me qeverinë në vjedhje, do të mbajë përgjegjësi”, paralajmëroi kreu demokrat Lulzim Basha, gjatë konferencës së sotme për mediat, ku publikoi planin e rimëkëmbjes me 5 pika të propozuar nga opozita.
Basha u shpreh se ekonomia është në pikiatë, varfëria po shtohet ndërsa përgjigjia e qeverisë është të ndajë më shumë lekë të taksapaguesve shqiptarë për një grusht klientësh të saj.
“Kjo duhet të marrë fund menjëherë, këto 6 muaj që u kanë mbetur.
Ndërsa sipërmarrësve të cilët joshen apo detyrohen në forma të ndryshme të bëhen pjesë e konkurimeve fallco dhe kontratave korruptive dua t’u drejtoj edhe një herë një paralajmërim të qartë.
Natyrisht përgjegjësia për këtë është e qeverisë, por edhe ju jeni përgjegjës, nëse bëheni pjesë e një skeme ku lekët që duhet të shkojnë për shëndetësinë, që duhet të shkojnë për arsimin, për familjet në nevojë ekonomike, që duhet të shkojnë për të papunët që kanë humbur vendin e punës, që duhet të shkojnë për të mbështetur biznesin e vogël, për ta shpëtuar ekonominë nga kolapsi, përfundojnë përmes dorës tuaj, në xhepat e qevritarëve të korruptuar, edhe ju do të mbani përgjegjësi. Por kjo i takon 25 prillit e tutje”, tha Basha.
