“Zgjedhjet e lira e të ndershme janë parakusht themelor për integrimin e Shqipërisë në Bashkimin Europian”, thuhet në një reagim të PPE-së, lidhur me situatën politike në Shqipëri, ku vijon debati për ndryshimet në Kodin Zgjedhor, ndërsa mazhoranca e Kryeministrit Edi Rama dhe opozita e drejtuar nga Lulzim Basha, ndahen për çështjen e koalicioneve parazgjedhore.
Grupimi më i madh politik në Parlamentin Europian, PPE, apelon që marrëveshja e 5 qershorit të zbatohet siç është rënë dakord konsensualisht.
“PPE mbështet plotësisht udhërrëfyesin e Shqipërisë drejt integrimit në BE, duke përfshirë zgjedhjet e lira dhe të ndershme si një parakusht themelor.
Reforma zgjedhore e 5 qershorit u miratua në mënyrë konsensuale dhe u mbështet ndërkombëtarisht dhe duhet të zbatohet siç ishte rënë dakord.
Ndryshimet e njëanëshme në këtë fazë, janë kundër rekomandimeve të OSBE / ODIHR si dhe kundër vendimit të Këshillit të BE për hapjen e negociatave të pranimit.
PPE nxit heqjen dorë nga çdo ndryshim i njëanshëm dhe respektimin e marrëveshjes konsensuale sipas zotimeve”, thuhet në deklaratën e PPE.
