Situata te klubi i Barcelonës vazhdon të jetë e trazuar pavarësisht përpjekjeve të drejtuesve dhe lojtarëve për të fshehur mosmarrëveshjet që ekzistojnë.
Humbja poshtëruese ndaj Bayern Munchen në “Estadio da Luz” ka shkaktuar një seri ngjarjesh që kanë tronditur klubin katalanas deri në themel.
Nga një votë mosbesimi ndaj presidentit Bartomeu deri te një kërkesë për largim nga Lionel Messi duket se nuk ka më ditë të qeta në Barcelonë.
Vota e mosbesimit kundër Josep Maria Bartomeu
Ndryshe nga Gerard Pique, presidenti Bartomeu nuk ofroi të tërhiqej pas humbjes 8-2 ndaj Bayern në Ligën e Kampionëve .
Megjithë presionin e madh nga mbështetësit, ai refuzoi të japë dorëheqjen dhe në vend të kësaj bëri thirrje për zgjedhjet në Mars 2021.
“Ne kemi një krizë sportive, jo institucionale,” këmbënguli ai në kanalin televiziv të klubit.
Tani ai përballet me një votë mosbesimi pasi një kërkesë prej 20,687 firmave – shumë më shumë se 16,521 të kërkuara – u paraqit në klub.
Bartomeu tani pret një referendum për të vendosur të ardhmen e tij në klub.
Tentativa për largim e Lionel Messit
Argjentinasi tronditi botën e futbollit, me kërkesën e tij për tu larguar nga Barcelona.
Kjo lëvizje e 33-vjeçarit bëri që marrëdhënia e tij me klubin të tensionohej mbi kontratat dhe klauzolat e largimit.
Në fund, Messi vendosi për të mos vazhduar betejën me katalanasit, një betejë që me siguri do të kishte përfunduar keq mes palëve të përfshira. Klubi i Barcelonës pretendonte që Messi mund të largohej nga Barcelona vetëm nëse paguhej klauzola prej 700 milionë eurosh. Nga ana tjetër babai dhe njëkohësisht agjenti i Messit, Jorge, argumentonte që klauzola ishte e pavlefshme dhe kishte skaduar me përfundimin e sezonit 2019-2020.
Duke parë këto përfundime, situata mund të merrte zgjidhje vetëm nëse palët do t’i drejtoheshin gjykatës diçka që Messi nuk preferoi ta bënte. “Barcelona është klubi im i zemrës dhe nuk dua të ndahem me luftë me ta”, deklaronte Messi për “Goal”.
